ඒක හැඟීමක් තර්ක නොතේරෙණ !

ඒක හැඟීමක් තර්ක නොතේරෙණ !

සිත්තම් මායා | අනූ පෙරේරා 

සටැලයිට් ෂොට් එහෙකට 

ඉන්දියන් සාගරය ෆෝකස් වූ විට 

සිරි ලංකාව පෙනෙන්නේ කෙලෙසද 

අන්න ඒ ලෙසටම 

තිබුණා පොඩිම පොඩි තිලකයක් 

ඇගේ නළලත මත 

හරි ලස්සනට ආඩම්බරේට 

ඉතිං ඒ වෙසඟේ  

ඇයවත් කැටුව ඇවිදින් 

ඇගේ බොදු යහළුවන් පන්සලට 

නුපුරුදුත් නෑ 

ඒ ආගමත් ආලෝකයට පහනට ලැදිනේ මේ ලෙසම 

ඉතිං ඒ දැල්වුණු පහන් අතරේ 

ඇයත් දීප්තිමත් දිවාලි පහනක් ලෙසට 

අපි අතර හරියටම තිබුණේ පහන් වැටක දුරක් බව 

තේරුණේත් නෑ එතරම්ම ඈතයි 

ඥාතිකමකට අපේ ආගම් දෙක 

ඇත්තමයි මම අහගෙන නුඹේ ඒ කැඩුණු සිංහල 

මමත් හිනැහුණා ඒවාට 

නුඹට නොදැනෙන්නට 

නුඹේ ළඟම යහළුවන් ලෙසම 

ඇත්තමයි පිච්ච මල 

අපටත් සමීපයි නුඹලාට සේම 

පුළුවන්ද මට විතරක්ම දෙන්න ඒ අයිතිය 

නුඹ දිහා හොරැහින් බලන්නට 

ආයෙත් නුඹට නොදැනෙන්නට 

ඒත් එකම වතාවක් කියන්න 

වැරදිද මම, 

එකම එක බැල්මකින් 

ආලයක් ගැබ් ගන්නට නොහැකිද හිතකට 

ෆිල්ටර් නොවේද අපි ගළපන ඒ ඉර හඳ තරු 

එහෙමත් නැතිනම් කුල ජාතිය එතකොට 

එහෙමනම් ඒක සාධාරණ හැඟීමක් නේද 

තර්ක නොතේරෙන 

නුඹ දන්නවාද ඒ මතකය 

තාමත් මා මනසේ භාවනාවක්ම බව 

ඉතිං හඳුනාගන්න මා කවුද යන වග 

නුඹේ මව්පියන් කිසිදා පිළිනොගන්නා සිංහලයා මම ! 

#අනුවා