නෑදෑයින් දුරින් සිටීම යහපත් ය !

ජන්මය ලැබිය යුත්තේ 

ජන්මයට අරුතක් එක් කිරීමට ය 

ආදරය ඊට කදිම ය 

මුග්ධ, මළ නොමළ 

සොම්බි ජීවිත වලට 

ආදරය දැනෙන්නේ නැත 

ආදරය ලැබිය යුත්තේ 

ආදරය දන්න උන්ට පමණ ය 

ආදරය කළ යුත්තේ 

පිරිමියාගේ හදවතට ය 

ආදරය කළ යුත්තේ 

ගැහැණියගේ ඇස් වලට ය 

ආදරය උපන්නේ 

පිරිමි පපුවේ ය 

ආදරය ජීවත් වන්නේ 

ගැහැණු ඇස් ඇතුළේ ය 

නෑදෑකම එසේ නොව,

එයට ඉපදීමක් 

හෝ මරණයක් නැත 

හමේ සෑදුන හොරියක් සේ එය 

දිගින් දිගට ම 

දිගින් දිගට ම 

ව්‍යාප්ත වන්නේ ය 

නෑදෑයින් සිටිය යුත්තේ 

අලුත් අවුරුද්දට නෑගම් යාමට ය 

ගොස් පාළු මකා ගැනීමට ය 

කුණු කන්දල් ලං කර ගැනීම 

ගඳ ගැසීම ට හේතුව ය 

එහෙයින් දුරින් සිටීම යහපත් ය 

ජන්මයට අර්ථය ආදරය ය 

ජන්මයට කරුමය නෑකම ය 

- රැහැන් මාරා | සිත්තම් මායා