මං තාම එතැන, පුළුවන්ද ඔයාට හැරෙන්න

මං හිතන්නේ

දැන් නම් ඔය හිත

ගිහින් ඇති ගොඩක් දුර

ඒත් මං තාම එතැන

පුළුවන්ද ඔයාට හැරෙන්න

ඇවිත් මාවත් එක්ක යන්න

එහෙමත් නැත්තම් මට කියාදෙන්න

නුඹව අමතක කර

ආයෙම නැඟිටින්න

හිරවෙලා මං මූසල අඳුරු ඉසව්වක

කවුරුත් නොපෙනෙන

නොදැනෙන කොහේදෝ තැනක

ගූගල් මැප්ස් ඔන් කරනවද

නුඹට පමණක් ලොකේෂන් එවන්නද

හා කියන්නෙපා බොරුවට

විශ්වාස කරයි හොඳටෝම දැන් මේ හිත

මම හොඳින් නැති බව

නුඹ දන්නවා නේද

ලෝකෙට හිනාවෙලා තනියෙන් දුක්වෙන

මන්තරේ ආයේ මට කියාදෙනවද

නැත්තම් මට එහා පැත්තෙන්ම ඉඳගෙන

කතා නොකර, නොඅල්ලා ඉඳිමුද

ඕනෑ උනොත් අඬන්නට

විතරක් ඔය උරහිස මට දෙනවද

මං තාම එතැන

පුළුවන්ද ඔයාට හැරෙන්නට

🖌 අනූ පෙරේරා | සිත්තම් මායා